هابدء كلامى واقول مش عايزة اخلف بنات.
عمرك سمعت بنت بتقول:
انا عايزة اطلقه .خلفته كلها بنات
انا مشدودة لراجل غير جوزى
انا هارميه فى الشارع بالعيال عشان يتربى
انا هاسيبه متعلق لا طايل سما ولا ارض
عمرك شوفت واحدة بتعاكس واحد بكل بجاحة وكانه حقها الطبيعى
كل اللى فاتت واكتر بيقوله وبيعمله الرجال فى حق النساء ومش ممكن نتخيل حدوث العكس ,ولو فكرنا للحظة ليه بيحصل كدة ؟؟؟ يا ترى ايه الاسباب ؟؟؟
بكل بساطة هم سابيبن واضحين جدا…
السبب الاول التربية فى داخل مجتمع بيشوف الست بنظرة دونية
والسبب الاهم عوار القوانين الخاصة بالاحوال الشخصية وقوانين العنف ضد النساء حتى مع التعديلات المتلاحقة بيظل هناك مشاكل فى التطبيق والاحكام الخاصة بالرافة للجناة …
حنان فتاة يتيمة الاب والام و متزوجة عمرها 29 سنة وعندها طفل 3 سنين جوزها اتخانق معاها وضربها ورمها بابنها فى الشارع فى نص الليل وغير مفتاح الشقة .راحت القسم عملت محضر لكن مفيش مكان تبات فيه ولازم تستنى الصبح عشان تروح نيابة الاسرة وكمان قرار التمكين مش هيطلع فى نفس اليوم اضطرت تسافر لاهلها فى الصعيد عشان خافت على ابنها وعشان تلاقى محامى يتابع القضية بتحتاج مصاريف وهى مش معاها اى مصدر دخل.
هو ده وضع المراة المعيلة الفقيرة للاسف مع كل الجهود المبذولة سواء على مستوى التوعية او سن القوانين او حتى تقديم الخدمات. لكن المحصلة اختيارات شديدة البؤس اما قبول العنف المنزلى والقهر واحياننا حتى قبوله بيكون اختيار غير وارد لان بيكون مصيرها الطرد والتخلى والتشرد وسوء اختارت الحل الثانى انها ترفض العنف اوتم التخلى عنها بكل اسف القوانين والتشريعات وطرق التفعيل اظلم من من ظلمها
والحل …….
الافراج عن القانون الموحد للنساء اللى مازال حبيس الادراج من سنين
وجود خدمات مخصصة للنساء داخل اقسام الشرطة تحول دون تشريد النساء فى الشوراع
الحد من احكام الرافة ضد الجناة
تعديل قانون الاحوال الشخصية
دعم المراة وحصولها على حقوقها وانها تعيش بكرامة يجب ان يحظى على الاولولية وفضح وادانة اى ممارسات اوسياسات تمنع النساء من التعبير عن ارائها او تشوبها اى انتهاكات.
وهاختم كلامى واقول نفسى بنتى تبقى رئيسة وزراء او رئيسة الجمهورية القادمة
